من نتائج التفحيط / الله يعافينا

السلام عليكم ورحمة الله وبركاته .
ابان تدريبي في الشرطه انهيت دوامي الساعه 12 ليلا وتوجهت لبيتي ووصلت مفترق طرق وكانت اضواء اشارات المرور لونها اصفر وكان المفترق خالي من السيارات .
وقبل ان اصل المفترق سمعت صوت صرير عجلات سيارات ومر على جانبي الايمن سياره وعن جانبي
الايسر سياره ثانيه وكانهم في سباق محموم وصاروا يساوون حركات مريعه بالسيارتين .
وقفت مكاني وامسكت جهاز الاتصال وابلغت مركز الشرطه عن السيارتين وابلغتهم اني ودي اروح عليهم حطيت اللمبه الحمرا على ظهر سيارتي وتقدمت عليهم وحين شافوا الضوء الاحمر .
كل واحد منهم اخذ اتجاه وانحاشوا واحد للشرق والثاني للغرب .
ابلغت المركز اني ودي الحق السياره البيضاء نوع متسوبيشي . رد علي شرطي في دوريه انه راح يقطع الطريق على السياره الثانيه وهي من نوع كيا .
لحقت السياره البيضا في اول فتحه بالشارع التف سايق المتسوبيشي واشر لي بيده الحقني .
دست على البنزين ونظرت في المرايا ما في احد وراي ضربت على البريكات ( الكوابح ) ولفيت مقود السياره حاولت اوصل قبله على المفترق لكنه كان سبقني ومر من قدامي بسرعه رهيبه لحقته وطلبت منه يتوقف كنت بعيد عنه حوالي 40 متر وظل مستمر بسرعته وفجأه سمعت صوت شيء وانقلبت السياره في ذيك اللحظه شاهدت دورية الشرطه قادمه باتجاهي .
قلبت السياره حوالي 3 مرات اتصلت على الاسعاف والدفاع المدني اطلعنا المصابين وكانوا 3 السايق كانت اصابته سيئه في راسه واطرافه واللي معه كسور في الايدي والارجل .
رحت لواحد منهم وطلبت منه رقم تلفون والد السايق عطاني الرقم واخذت متعلقات السايق محفظته وجواله اضطر رجال الدفاع المدني انهم يقصوا سقف السياره اللي فوق السايق حتى يطلعوه من السياره وحملوهم للمستشفى .
رجعت للمركز واتصلت على والد السايق وحين جا بملابس النوم وطرح السلام علي رديت السلام .
قلت له: تفضل استريح .
قال : عسى ما شر تستدعوني على المركز في الليل ؟
قلت له : ابنك فلان ؟
قال : نعم ابني ليش ؟
قلت له : وين ابنك ؟
قال :عند اخته .
قلت له : ابنك في المستشفى كان يسوق سياره ويفحط بيها ومعه 2 من اصحابه .
روح تطمن عليه وهاذ متعلقاته شفت نظرات أسى في عينيه واغمضهم .
قال : الله يسامحك يا ولدي تكذب علي !!!
السياره اللي كانوا يفحطو فيها مسروقه وصاحبها مسافر هو وزوجته .
حين رجع ابلغناه فجا وشاف السياره مدمره رفع عليهم شكوى .
حين احضرناهم للمركز واخذنا افادتهم بعد طلعوهم من المستشفى اهاليهم قالوا لصاحب السياره نشتري لك سياره بدل سيارتك ونفس الماركه ونفس الموديل وتتنازل عن حقك الشخصي .
الرجال وافق بشرط انها السياره تكون خاليه من العيوب وغير مرهونه .
حين شاف السياره واعجبته شروها له وتنازل عنها صاحبها له في دائرة السير جا وتنازل عن حقه الشخصي .
اللي كانوا في السياره 2 اصابتهم خفيفه كسور في الاطراف لكن السايق كانت اصابته قويه اصابه في الراس والاطراف ونزيف داخلي .
حين احضرناه للمحكمه كان غير قادر على الكلام القاضي اجل محكمته اسبوعين .
وحين احضرناه المره الثانيه .
قاله القاضي : انت مذنب ؟
قال : نعم مذنب !!
حكم عليه القاضي يروح هو واللي معه على الاحداث لانهم اعمارهم اقل من 18 سنه .
نتيجة التفيحط اصابه ما يلي .
الاولى :شلل في اصبعين في يده اليسرى .
الثانيه :نسبة عجز في عينه اليمنى بلغت حسب الكشف الطبي 18 بالمئه .
الثالثه : عاهه مستديمه في قدمه اليمنى ما يقدر يسير بشكل طبيعي ( عرج خفيف ) .
الرابعه : صار له ملف في الشرطه والتهم التاليه .
1 : سرقة سياره .
2 : سياقة سياره مسروقه والقيام بحركات تودي للموت والاصابات الشديده .
3 : عدم الامتثال لأوامر الشرطه والهروب منها .
4 عدم احترام قوانين السير .
5: السياقه بسرعه متهوره مما ادى لاصابته الشديده .
6 : تحطيم سياره مسرقه بسياقته الرعناء .
وبالتالي لن يحصل على رخصة سياقه طوال حياته .
اتمنى انها السالفه تنال رضاكم .

تسلم والله أخوي على الموضوع والله يهدي ضال المسلمين .....

الحمد لله الذي عافانا مما ابتلاهم به

ألف شكر وجزاك الله خير

السعيد من وعظ بغيره