منتديات البرية - منتدى البرية الحقوقي الأول من نوعه

شريت منهم ثلاجة هوم كوين والله ياجماعه اني في بهذله معهم من شريتها .. آخر شي صرت اصلحها عند الورش الي برا .. المهم وتخرب قبل 7 ايام من اليوم الأربعاء 1 / 9 / 1431هـ يعني بيوم الأربعاء 23 / 8 / 1431هـ خذوها من بيتي بالرياض وراحوا بها قالوا بنشوف وش فيها ونصلحها لك .. قلت ارفقوا علي بالسعر .. قالوا طيب بس الحين سدد 100 ريال حق طلعتنا وبعدين نتفاهم معاك .. قلت والله لو اني مجرم بمخفر شرطة تتعاملون معي بهالأسلوب .. المهم سلمت امري لربي وعطيتهم 100 ريال تخبرون صيفنا نار موقده ولا نقدر نستغني عن الثلاجة ساعة .. والبابطين لاعبها صح مايخرب الثلاجات الا بالصيف .. هههه المهم نرجع للجديه بالموضوع .. عطيتهم 100 ريال وراحوا بالثلاجة يقول لي الهندي الي تبع الورشة حقت البابطين وكيل الغفلة يقول ابد الأحد بالكثير وهي عندك قلت اتصبر مابوه مشكلة وحشرت اشغالي وطماطي وجبني ولحمي بثلاجة كبر عيني .. بالدور الثاني .. بالعربي حطيتهن بثلاجة غرفة النوم .. حسبي عليك يالبابطين نشرتنا غسيلي .. المهم واحتري هالثلاجة تجي واحتري واحتري ولا حولك احد .. واتصل على رقم الورشة 4482100/01 وامشي على تحويلاتهم ولا احد يرد .. او يردون يقول شوي يكلمك الفني .. ولا فني ولا هم يحزنون ولا جاني احد .. اخر شي سلمت امري لربي .. وقلت اشري جديدة واعتبر هالثلاجة ياولد انه مطمور ببيتك ومسروقة منك .. يوم جاء قبل امس الي هو الأثنين ويتصل علي واحد اتصل على جوالي اتصل علي من هذا الرقم 2952356/01 قلت سم قال بنبرة تقول بوسط معركة انت فلان قلت ايه قال ثلاجتك خربانه قلت ماجبت جديد عارف انها خربانه قال وتكلفك 320 ريال .................... بكل صراحه مسكت راسي قلت 100 خذوها يقولون حق طلعتنا والحين بياخذون 320 ريال يعني المجموع 430 ريال حسبي الله عليك يالبابطين والله لايبارك لك والله ياخذ بحقي منك ... قلت صلحها وش اسوي اقول رجعها ويحسب علي حق طلعه بعد 100 ثم اصير مثل حمار جحا ... قلت صلحها توكلنا على الله قال خلاص بنصلحها وبكره تكون عندك بس خل جوالك فاتح وانتبه نتصل عليك ولا ترد .. قلت طيب يالحبيب متى ساعه لعشان انتبه اكثر قال مدري ممكن الصبح ممكن الظهر ممكن العصر .. اخس عليك من شركة واهانه لعملائك وللشعب .. سلمت امري لربي وقلت زين زين واحتريهم يجون على وعده الي هو بكره على كلامه يعني الثلاثاء امس ولا حولك احد واتصل عليهم ولا احد يرد قلت اااااه بس يالصفرة راحت علي التصفيره ولا جت ثلاجة ... ايه سكت وطلبت ربي بالتراويح البارح انها تجي واستجاب الله دعاي واتصلوا علي قبل ساعه وربع من الآن يعني على بعد صلاة الظهر قال وينك فيه قلت في البيت قال يالله جايينك بالثلاجة .... قلت زين وجاو ونزلوها ومشوا وسددت لهم قصت الظهر والله حسيبهم وهاذي صورتهم العمال وهم ينزلون الثلاجة